「學富五車」 五車裝到幾多書？

喺古代形容一個人學識淵博，好多時候都會用到「學富五車」呢個詞，但到底學識同「五車」有咩關係？「五車」又可以裝到幾多書呢？

「學富五車」講開就真係有段故，呢個詞係出自《莊子.天下》篇，當中就提到「惠施有方，其書五車，其道舛駁，其言也不中。」惠施係戰國時代嘅思想家，佢主張任何事物都要循名責實，係名家嘅代表，但佢嘅思想就同主張超脫逍遙嘅莊子有頗大出入。

莊子就對惠施有咁樣嘅評價，大概意思就係話，惠施佢雖然讀過嘅書多達五車，但就係雜亂無章，講嘅道理亦都唔適切。由呢句說話可以理解到，當時讀過五車書已經係學識嘅象徵，之不過要注意嘅，當時嘅書都仲係用竹簡刻成，如果裝滿五車都只係現代嘅幾本書左右，「學富五車」都只係拎當中嘅意思嚟形容人學識淵博。