曾是尖沙咀位置最高建築物——天文台總部

又係時候同史友們介紹下每區嘅一啲特色建築喇，今次就同大家講一講一座有百幾年歷史嘅法定古蹟，喺建成嘅時候，呢座建築物亦都曾經係尖沙咀位置最高建築物，佢就係天文台總部喇！

天文台總部位於九龍尖沙咀彌敦道134A號，當中有幾個唔同部分嘅建築物，其中最早嘅部分係建於1883年，呢座樓高兩層嘅1883大樓建成初時座落喺伊利近山之上，東南西北都有良好嘅視野，維港、香港島一帶，甚至去到大嶼山都見得到，真係觀測氣象嘅好地方。

1883大樓係一座由磚砌成嘅長方形大樓，入面設有台長辦公室、測風機、修正時鐘機及風雨針等儀器，室外就有量雨機、寒暑表、觀星儀等等，當年嚟講都幾先進。但時至今日，1883大樓就主要係辦事處、會議室同埋歷史展覽室，觀測氣象嘅任務主要就交畀京士柏氣象站同埋機場氣象所。