伊利沙伯皇后號發生災難級火警

喺1972年嘅今日，被稱為「大西洋第一夫人」嘅皇家郵輪伊利莎白皇后號（RMS Queen Elizabeth）喺香港海域發生史上最大型嘅海上火災，亦都係唯一一次「災難級火警」。呢次火警釀成14人受傷，而伊利沙伯皇后號亦都燒足101個鐘。

呢艘咁犀利嘅遠洋客輪，原身係喺提供由英國南安普頓經法國瑟堡到美國紐約嘅豪華班輪服務，由於喺1938年落水，所以就以時任王后伊利沙伯命名。由1930年代末至1970年代初，呢艘客輪都係全世界最大最豪華嘅郵輪，去到70年代，香港船商董浩雲斥資320萬美元購入郵輪，並且計劃耗資1,200萬港元將呢艘客輪改建成教育用途嘅流動大學，命名為「海上學府」。

伊利莎白皇后號喺1971年7月到達香港，並且喺青衣島同埋昂船洲之間進行改裝，喺工程差唔多完成，準備啟航之前嘅六日，郵輪就發生大火。消防處接報後就列為一級大火，並且派出130名消防員同埋滅火輪葛量洪號趕赴現場撲救，但點知火勢猛烈，全船八成結構焚毀。雖然當時認為火災係人為造成，但至今都搵唔到真兇。