坪洲唯一公共屋邨——金坪邨

坪洲一直以嚟都係唔少港人假日嘅好去處，而唔知史友們去到坪洲果陣，又有冇見過一棟棟外型好相似、色彩好鮮艷嘅建築物呢？呢個建築群正正就係金坪邨喇！

金坪邨位處坪洲坪利路21號，唔單止外型獨特，佢仲係成個坪洲唯一一條公共屋邨，由當年房屋署總建築師設計，並且喺1996年入伙，係好少數喺海邊嘅公共屋邨。有別於市區嘅其他公共屋邨，金坪邨所採用嘅係一種好特別嘅樓宇設計，就係和諧鄉村式大廈。呢種設計係專門為鄉郊地區設計，樓宇高度同埋單位位置都可以因應地盤而修改，每座就普遍只會樓高4到6層，人口密度都真係幾低。

仲有一點值得一提，就係金坪邨內嘅1A及1B座現時就唔係公共屋邨，反而係轉作居者有其屋計劃，亦即係坪麗苑。