「新澤西－食水深」係點嚟?

今日今日資訊發達，購物果陣格價係相當方便，假如發現一件貨品售價同埋成本價差好遠，通常都會話個老闆「食水深」，唔知史友們又有冇聽過一個講法，就係叫做「新澤西－食水深」。

「新澤西－食水深」呢個歇後語其實喺上世紀50年代開始流傳。其實早喺50年代開始，香港由於水深廣闊、加上船埠設施相當完善，一直都有唔少美、英國家嘅艦隻來港停泊。喺1953年果陣，一艘相當龐大嘅新澤西號（USS New Jersey）就嚟到香港，呢艘愛荷華級戰艦，排水量達約5萬7千噸，仲裝有16吋大砲參與過唔少戰役，總之當年就係相當威風啦！

之但係，亦都係因為呢艘「新澤西」號太大，排水量超勁，食水好深，所以無辦法駛入香港海港，只能夠停喺鯉魚門外面俾人參觀，所以就有「新澤西，食水深」嘅講法。而當年唔少市民知道「新澤西號」到嚟，仲爭住搭小輪出鯉魚門睇，雖然唔能夠上艦艇、只可以搭船圍住「新澤西號」兜圈，市民都覺得好得意。