早排阿史就同大家介紹到內地嘅考古隊發掘到唐朝「九成宮」遺址，並且有可能係唐高宗同埋武則天寢殿，而近排又再次有一個同武則天家族有關嘅墓葬被發掘。

阿史今次想介紹嘅就係由陝西省考古研究院喺西咸新區空港新城搵到嘅兩座唐代紀年墓葬，呢兩座墓葬形制完整，紀年明確，而且仲有唔少精美嘅壁畫。其中一座係楊氏夫婦合葬墓，形制上嚟講總長達到33.5米，有5個天井、5個過洞、4個壁龕、東西兩壁同埋墓室四壁都有樂舞圖嘅壁畫，墓室入面仲有擺放食品嘅枱，規模同形制嚟講都真係唔簡單。

墓葬入面仲有一樣好重要嘅發現，可以令到人知道墓主嘅身份。據墓誌記載，墓主係楊知什、龐大家，而楊知什同武則天之間就有好曲折嘅關係。楊知什係武則天外公嘅曾孫，而楊知什姪女元獻楊皇后又係武則天個孫唐玄宗貴嬪、唐肅宗嘅生母，所以楊氏夫婦同當時唐代皇室同埋武則天都有住好密切嘅姻親關係。

原圖嚟自網絡