外國官員訪港其中一站——彩虹邨

近排因為疫情關係，令到大家都無辦法出去旅行，咁就令到香港人每逢假日都會周圍去。除咗行山係其中一個熱門活動之後，去彩虹邨影相打卡都係大家常做嘅事，但原來幾十年前都已經有人咁做架喇！

位於黃大仙區牛池灣嘅彩虹邨，相信大家都曾經去過睇過，呢個香港最早期興建嘅公共屋邨之一，由於設計上融入咗包浩斯風格，喺當年亦都拎到香港第一個建築獎項，認真巴閉。

彩虹邨原身係九龍十三鄉之一沙地園嘅田地，喺1958年政府就出呢塊土地興建大型屋邨，有8幢20層高長型高座以及3幢7層高相連式低座住宅大廈分別喺1962年至1964年間分期落成，係當年比較有規劃嘅一個屋邨工程。或者係因為呢個原因，當年嘅港督同埋唔少嘅外國官員只要一嚟到香港，彩虹邨就係佢哋參觀嘅其中一站，就好似前美國副總統尼克遜（1964年）、英國瑪嘉烈公主（1966年）、雅麗珊郡主伉儷（1980年）等等都有嚟過！