尋日阿史就講到太平洋戰爭入面，日軍就喺瓜達康納爾島海戰戰敗並且因為咁而喪失制海權、開始撤退。而其實，早喺瓜達康納爾島海戰之前，日軍就經歷過一次慘敗，呢場海戰名為中途島海戰。

喺經歷過1942年4月18日杜立特空襲後，日軍就相當防範美軍，擔心佢哋可能會直接攻擊日本本土，於是日本嘅海軍大將就積極策劃對中途島嘅攻佔計劃。當時日軍原本係預計會派出6艘航空母艦提供空中支援，但就因為珊瑚海海戰令到其中兩艘無法參戰，令到南雲艦隊冇咗接近三成嘅空中兵力。

唔單止咁，其實喺日軍準備進攻中途島之前，日軍嘅通訊密碼就已經被美軍破解到，美軍亦都隨即要求「企業號」以及「大黃蜂號」航空母艦喺中途島東北海域埋伏；並且仲緊急修理「約克鎮號」航空母艦，以求組成一支特混編隊。

結果喺1942年6月4日，日軍嘅南雲部隊就空襲中途島，喺未能發現到美軍艦隊嘅情況之下，日軍南雲艦隊嘅「赤城」、「加賀」、「蒼龍」同埋「飛龍」號航空母艦逐一被擊沉，一場海戰就損失4艘航空母艦，山本大將亦都向全軍宣布撤消戰役計畫並開始撤退，日軍喺短期之內亦都發動唔到大型戰役。

原圖嚟自網絡