提起香港嘅古村屋，相信唔少史友們都會第一時間諗起圓洲角嘅王屋又或者荃灣嘅三棟屋，但其實遠在柴灣都一樣有古屋，阿史今次就同大家介紹下羅屋民俗館。

呢間位於柴灣嘅古屋，現時唔單止係歷史博物館五間分館之一，仲被列為法定古蹟。羅屋民俗館原名係叫做羅屋，始建於清朝乾隆年間，至今已經有二百幾年歷史。喺十八世紀初，寶安嘅居民遷移嚟到香港柴灣建村定居，分別建立羅屋、成屋、藍屋、陸屋、西村及大坪村等六條村。

而比較珍貴嘅係，呢間古屋嘅戶主仲有保留喺乾隆三十二年（1767年）2月仲獲發紅印契、並且喺嘉慶元年（1796）11月亦都收到稅契，可想而知呢間古屋歷史相當悠久。

隨著市鎮的發展，原有村落相繼消失，好快就只係淨低羅屋一間村屋，而羅氏亦都喺1967年全部遷離羅屋，1976年5月，香港市政局轄下博物館委員會決定將羅屋修復為民俗館，並且喺1989年列為法定古蹟。

原圖嚟自網絡