之前介紹光復會歷史嘅時候,就提到光復會要陶成章响民國成立無耐就被蔣介石刺殺。嘩!咁似民初電視劇嘅,咁呢次暗殺事件又係點樣發生呢?

呢次事件有一位關鍵人物,就係陳其美。記得好耐之前都介紹呢位傳奇人物,陳其美早年响上海謀生,之後去咗日本留學,期間認識咗孫中山先生,投身咗革命事業。至於佢亦响日本結識蔣介石,仲結拜做兄弟,仲將蔣介石推薦俾孫中山先生。

講返呢次刺殺事件,响武昌起義後,光復會就响江浙一帶起事響應,而佢哋嘅首領陶成章就返咗去上海,後嚟仲控制埋杭州。其實陶成章同孫中山先生係有過過節,陶成章曾經因為懷疑孫中山先生私吞華僑捐款而發表《孫文罪狀》,指責孫中山先生「謊騙營私」,仲迫佢辭任同盟會總理一職。所以,當陶成章响上海一帶活躍行事,就引起咗陳其美不安,擔心陶成章會加害自己,仲會捧光復會嘅章太炎做領袖而反孫中山先生。結果,陳其美就派蔣介石同王竹卿,响1912年1月14日潛入上海廣慈醫院,刺殺响醫院療養嘅陶成章。

呢件事蔣介石响佢嘅日記都有提及:「陶成章亦回國即與英士相爭……且欲以浙江之光復會代(同盟會)為革命之正統……及陶親來運動余反對同盟會,推章炳麟(章太炎)為領袖,並欲置英士於死地,余聞之甚駭,且怨陶之喪心病狂,已無救藥,若不除之,無以保革命之精神,而全當時之大局也。」

事後,孫中山先生就發電報俾陳其美,要佢緝捕兇手,仲要「明正其罪」。不過,蔣介石就响往後嘅《事略稿本》,提及刺殺陶成章之後,開始獲得孫中山先生信任。

原圖:網絡