九華徑原名係「狗爬徑」？

近排海洋公園嘅救亡方案公佈咗之後，唔少網友都講返起昔日香港嘅幾個主題公園，其中一個就係荔園。荔園都同大家介紹咗好多次，今次阿史就講一講九華徑啦！

位處新界葵青區嘅九華徑，昔日就係荔園所在之處，今時今日就係華荔邨和荔欣苑嘅位置，附近仲有荔灣花園、華豐園、九華徑村等等，係一個相當有規模嘅住宅區。聽到「九華徑」，史友們都可能覺得幾順耳、仲有啲文化氣息，但其實「九華徑」以前係有一個都好通俗嘅名，就係叫做「狗爬徑」。原來以前九華徑呢個地方係山路居多，而且地勢真係陡峭，於是村民行上去嘅時候就好似野狗上山爬下爬下咁樣，所以就有「狗爬徑」呢個名。

「九華徑」曾經係荔園所在之處，以前亦都有唔少名人居住過，就好似國畫大師黃永玉、作家樓適夷、詩人臧克家，就連馬英九都係喺九華徑村出生。