廖仲愷刺殺案成不解謎團

上次講過陳其美指使蔣介石刺殺光復會要員陶成章嘅故事，其實响清末民初時期，中國政壇都有一股暗殺風氣，响上世紀二十年代，就有一宗到今日都未破案嘅刺殺事件，就係廖仲愷刺殺案。

廖仲愷早年加入同盟會，後嚟成為國民黨革命元勳之一，多年嚟都係孫中山先生嘅左右手，跟隨過去參與護法運動，又同孫中山先生一齊流亡。响二十年代，孫中山先生實行國共合作，當時中國國民黨黨內就有部分人有微言，包括孫中山先生另一得力助手故漢民，以及軍人蔣介石。至於廖仲愷就係一位左派，堅持實行「聯俄、容共、扶助農工」政策。

响1925年8月，廖仲愷就响廣州市內嘅中國國民黨中央黨部門口，被人行刺身亡。對於邊個落命令刺殺廖仲愷，事隔九十幾年都無一個明確講法。唔少人估計係胡漢民個細佬胡毅生指使，因為廖仲愷同胡漢民响黨內嘅政治分歧都相當公開。亦有話係黨內元老朱卓文，因為佢就講過話要殺廖仲愷。亦有懷疑過係蔣介石同江精衛，因為响廖仲愷被刺後，就成立咗個調查委員會，但最終調查草草了事收場，因此有人懷疑會唔會係自己查自己所以無結束呢？不過有個事實可以肯定，就係國民黨右派响呢件事發生後，開始主導咗黨內形勢。