「八股文」要點寫？

今時今日如果提起「八股文」，普遍嘅聲音都係鬧多過讚，甚至「八股文」仲被視為係封建腐朽嘅代名詞，咁到底呢種文體係點樣寫呢？

關於八股文嘅起源，至今為止都仲未有一個結論，喺宋、元年間，對考試嘅文體並無規格、對仗排偶等等嘅要求，只係去到明、清兩代先至將科舉中寫文章嘅部分轉為「八股」。所謂嘅「八股」係一種特殊文體，喺明朝開始就有所規定，先係由王鏊、謝遷等人提議講究格律、步驟；去到成化二十三年就由原本嘅一啲「經義」變為開考八股文，由格式、字數、經注都相當講究，基本上係冇自由發揮嘅空間。

「八股文」入面嘅「八股」分別就係破題、承題、起講、起股、中股、後股、束股同埋大結，每個部分都有相應嘅內容要求，行文格式上亦都有句數、對應、排偶、句式等等嘅限制，有啲部分仲有風格要求，既會考《五經》亦都會考《四書》，短短時間內要完成幾百字，真係唔容易！