最近阿史睇緊關於新界地區發展嘅資料，睇到關於屯門嘅資料時，記得細過因去探親戚而去過一條叫新發邨嘅公共屋邨。以前阿史都講香港部分屋邨係同人名有關，新發邨都唔例外。

新發邨係政府响屯門興建嘅首個公共屋邨，1971年落成，先後名為青山新區大厦同青山邨，但响1974年為配合「青山區」改名為「屯門區」，於是將青山邨就易名為新發邨。呢條邨到咗2000年就被當局收回同拆卸，原址就成為屯門西鐵站同V city一帶。

好喇！咁呢條新發村又同邊個有關係呢？就係陳日新同劉皇發喇！陳日新响六七十年代係時任屯門鄉事委員會主席，劉皇發就係副主席。佢哋兩個早响五六十年代已經參與鄉政事務，仲幫當時港英政府解決咗唔少問題，好似游說龍鼓灘村民出售地皮予政府用作英軍操炮區；响1967年聯同其他地區嘅鄉紳組織「民安聯合促進會」維持新界各區秩序等。港英政府為表揚佢哋兩位嘅貢獻，所以就將兩人個名各取其中一隻字，成為屯門區首個公共屋邨嘅名喇！

原圖：網絡