香港開埠 180 周年

喺1841 年 1 月 26 日，對香港呢片土地嚟講係影響好深遠嘅一日，事關呢一日係被視為香港開埠嘅日子，計下數今年就係第180周年。

喺第一次鴉片戰爭爆發之後冇幾耐，清朝就由主戰嘅態度變成主和，英國海軍上將義律同兩廣總督琦善私底下訂咗條《穿鼻草約》，並且喺1月25日卑路乍就率領海軍喺上環水坑口登陸香港島。

喺1841年嘅1月，英軍其實早喺24日就派出砲艦硫磺號（HMS Sulphur）去到港島進行測量，並且製作地圖，而喺25日嘅上午，硫磺號艦長卑路乍（Edward Belcher）就已經帶同官兵先行登陸上環水坑口。咁點解香港開埠嘅日子又會計做1月26日呢？原來喺1月26日，英軍先至集齊艦隊，並且喺英軍總司令伯麥（Gordon Bremer）嘅主持之下，進行升旗儀式，皇家海軍陸戰隊鳴槍、軍艦鳴炮，所以呢一日先至被視為係開埠嘅日子。