又係時候同史友們介紹一啲香港早年傑出嘅人物，如果講起九巴、講起牛奶公司，唔知史友們會唔會諗起呢位人物呢？今次阿史想介紹嘅正正就係曾經做過呢兩間公司董事長，亦都喺六十年代做過立法、行政兩局首席非官守議員嘅周錫年。

周錫年出生喺1903年，佢嘅家世亦都唔平凡，祖上曾經係清朝名士，伯父亦都係做過立法局非官守議員嘅周少岐太平紳士。佢幼年入讀聖士提反書院，1918年畢業後進入香港大學修讀醫科，後來喺1923年拎到內外全科醫學士學位（MBBS），仲去埋英國倫敦大學深造，之後果幾年仲拎埋英格蘭喉科及耳科文憑（DLO）、眼科醫學及外科文憑（DOMS）。去到1927年，佢就決定返到香港行醫，成為當時香港第一位華人耳鼻喉科醫生，同時亦都喺香港大學眼科擔任講師。

熟悉周錫年事蹟嘅史友應該都知道佢嘅經歷唔止咁簡單，佢喺華人社會有一定嘅地位，仲出任埋醫學會會長，於是去到30年代至60年代，佢先後擔任過立法、行政兩局首席非官守議員，期間仲被委任為非官守太平紳士。

周錫年唔單止喺醫學同埋公職方面有發展，喺商業上佢都有唔少成就。佢喺1955年成立華人銀行自任董事長，亦都先後出任牛奶公司、九龍巴士、惠康有限公司、國際牛奶有限公司十幾間公司嘅董事長，呢啲經歷真係非凡。周錫年嘅晚年並唔係咁好過，有件好轟動嘅事大大打擊到佢，下篇再同大家介紹下。

原圖嚟自網絡