記得讀中學個陣,中史老師就講過古代中原係無馬,馬主要係由北方引入(雖然呢個講法未必絕對準確)。不過,唔知史友有無聽過响古代南方嘅揚州盛產瘦馬呢?

史友們見到「瘦馬」呢個名,就千祈唔好誤會真係一匹馬,而係指妓女。响古代,揚州係南北水脈交匯之處,貨轉南北,有商人就自然有商人娛樂之地,所以古時揚州係著名嘅煙花之地。關於「揚州瘦馬」之說,响明代《五雜俎》就有咁嘅記載:「維揚居天下之中,川澤秀媚,故女子多美麗,而性情溫柔,舉止婉慧。固因水澤氣多,亦其秀淑之氣所鍾,諸方不能敵也。然揚人習以此為奇貨,市販各處童女,加意裝束,教以書畫琴棋之屬,以邀厚值,謂之『瘦馬』。」點解叫瘦馬呢?其實隱含咗兩個意思,一為指啲童女瘦弱,另一意思就係佢哋好似育馬販馬咁,低價買入,經育成後賣出。講到底,就係販賣人口同色情行業嘅結合。

原圖:網絡