又係時候同史友們介紹一啲中國古代嘅名人，有讀開詩詞嘅史友應該都會讀過南唐後主李煜嘅作品，現存38首詞自然真率，醇厚率真，直係空前絕後，後世甚至用「作個才人真絕代，可憐薄命作君王」嚟形容佢。

關於呢位「千古詞帝」嘅生平，史書記載佢係南唐元宗（中主）李璟第六個仔，自幼就係「為人仁孝，善屬文，工書畫，而廣顙豐額駢齒，一目重瞳子」。由此李璟第二到第五個仔都係早死，所以李煜無意間就做咗第二子，但亦都因為驚長兄李弘猜忌而唔敢參加政事，終日就醉心研究典籍，以讀書為樂。

後來長兄李弘毒死咗排行第三嘅皇子李景遂之後自己都死埋，最後就由李煜成為太子，仲喺金陵登基即位。據史書描述，李煜「性驕侈，好聲色，又喜浮圖，為高談，不恤政事」，在位15年期間亦都大興宗教，以佛事為憑。喺朝政之上，佢基本上冇野心，甚至仲對宋稱臣，改用宋朝年號，但去到975年12月，金陵都係被曹彬攻克，南唐滅亡李煜被俘。

喺佢被俘嘅呢段日子入面，佢喺痛苦鬱悶嘅情緒之下寫咗唔少出色嘅作品，就好《望江南》、《子夜歌》、《虞美人》等。978年，李煜因為對徐鉉講錯說話，宋太宗亦得知佢所寫嘅「故國不堪回首月明中」、「恰似一江春水向東流」，最後就命人毒死李煜。

原圖嚟自網絡 顯示較少內容