繼續同史友們介紹一啲香港現代重要嘅設施，發電廠以往都有同大家介紹過，香港最早期嘅發電廠相信大家都知道係永豐街一帶嘅灣仔發電廠，當時呢所發電廠建成初時最大嘅發電量就只有100千瓦。時間嚟到現代，到底全港最大嘅發電廠又可以供到幾多電呢？

今次阿史就同大家介紹下青山發電廠啦！呢所位於屯門區踏石角青山西南面山腳嘅發電廠，係現時香港最大嘅發電廠，主要係以燒煤發電、燃燒天然氣為輔。雖然係現代嘅建設，但青山發電廠都有返咁上下歷史！早喺1978年，青山發電廠嘅A廠就開始動工，並且喺1982年落成同埋投產。至於B廠就係喺1986年落成，當年唔少外國政要好似英女皇伊利莎伯二世都有嚟到參觀。

咁到底呢所全港最大發電廠可以生產到幾多電呢？如果係計最大發電量，呢所發電廠係可以生產到4,108兆瓦嘅電力，真係唔惹少！

原圖嚟自網絡