石崗船民中心騷亂

1992年2月3日，喺石崗船民中心就發生咗一場香港史上傷亡最慘重嘅越南船民騷動，事件最終造成24人死亡，接近130人受傷。

喺60年代嘅時候越戰爆發，果陣就已經有大批越南人逃離家鄉，直到1979年英國政府簽署國際公約，宣佈將香港定為「第一收容港」，接收抵港符合資格嘅越南船民繼而再分批幫佢哋轉到外國。直到最後一個難民中心喺2000年關閉為止，歷年嚟香港就一共接受咗接近20萬越南船民，喺社會唔同層面引發唔少問題。

喺1992年嘅今日，當時正係年三十晚，位於元朗嘅石崗船民中心就有兩批南越同埋北越人因為買賣私酒同爭用熱水等問題爆發衝突，雙方就出動到長矛、利刀、鐵通同汽油彈等武器互相打鬥，最後事件就演變成大騷亂。駐守難民營嘅紀律部隊人員都未能控制場面，南越陣營敗退而北越人就放火燒營。事件最終去到清晨結束，造成24人死亡，130幾人受傷，警方其後拘捕170人，當中18人被控謀殺。