洪水橋嘅命名同明朝一件事有關？

如果有史友係住喺屯門區，相信對洪水橋呢個地名都唔會覺得陌生，呢個元朗區內嘅小型鄉鎮，位處屏山西南面、紅水河支流之上。唔知史友們又知唔知，其實洪水橋原名係叫做「紅水橋」，而呢個命名據講係同明朝一件事有關。

相傳喺明朝嘅時候，元朗橫州一帶就有一個無惡不作嘅毛氏，當時附近屏山鄧族嘅居民忍受唔住，最後就有一位成員向朝廷上書，希望朝廷可以發兵幫手。結果，朝廷真係發兵，仲決定將呢個毛氏誅九族。喺官兵圍攻之後，毛氏最後都係不敵，佢嘅村民族人喺晚上衝出圍門沿小路逃走，去到丹桂村一帶就畀官兵追上殺死。毛氏族人嘅血將溪水染紅，自此以後呢條溪澗就被稱為紅水坑，下游所建嘅橋就叫做紅水橋。

時至今日，洪水橋已經係唔少中等密度住宅嘅所在地，未來仲會成為新界北商業核心區，真係舉足輕重。