如果有史友們行開上環一帶，唔知又有冇經過安和里呢？就咁聽個路名好似正正常常冇乜問題，但其實安和里仲有第二個名係叫做「二奶巷」，到底當中又有咩故事呢？阿史今次就同大家介紹下啦！

呢條位於中西區嘅一條上坡巷仔，串連住上環九如坊、歌賦街同埋皇后大道中，咁點解冇啦啦又會有「二奶巷」呢個別稱呢？據講喺19世紀果陣就有個有錢人，佢係從事鴉片煙事務嘅煙商，二奶就叫做「阿安」，大婆就叫做「阿和」。本來都冇乜事發生，之但係二奶就幫呢個鴉片商人生咗個仔，呢個商人為咗安撫二奶，最後就買咗呢條巷，並且將二奶個名排頭，而大婆個姓行尾，所以就叫做「安和里」。而到咗後來，大婆都生咗一個仔，呢位商人就喺中環同樣買咗條巷，命名為「和安里」，故事就係咁講，係真係假就真係冇人知喇！

原圖嚟自網絡