如果有史友平日係有去開九龍城侯王廟參拜，行過路過又有冇見到對面有一座石屋咁樣嘅建築呢？呢座就係阿史今次要為大家介紹嘅何家園石屋喇！

呢座位於聯合道前何家園寮屋區內嘅中式平房，現時就已經被列為三級歷史建學，普遍嚟講居民都會叫佢做何家園石屋、九龍城石屋，而官方就叫做侯王廟新村舊民居。心水清嘅史友應該見到，阿史開頭就講過呢座建築物前身係半歐陸式大宅，咁又因乜解究會變咗做中式平房呢？

其實早喺1880年代到1890年代之間，當時何氏家族就喺現址興建咗一座樓高兩層嘅半歐陸式華麗大宅，仲配埋花園同埋果園，命名為何家園。如是者呢座建築物一直都係由何家人居住，但係去到日軍侵佔咗香港之後，日軍為咗擴建啟德機場，就喺九龍城強拆多條鄉村，何家園嘅大宅亦都係其中一個目標。

喺完成清拆之後，日軍就喺現址興建咗一群中式平房，亦即係大家現時見到呢座石屋咁樣，並且命名為「侯王新村」。喺戰後，大量難民嚟到香港，圍繞住呢個地方興建平房寮屋，九龍城就逐漸出現侯王廟新村、荔枝園同埋何家園等等嘅寮屋區。

直到2001年，政府就清拆呢一帶嘅寮屋區，石屋成為村內僅存建築物，並且通過「活化歷史建築夥伴計劃」活化成懷舊冰室同埋文物探知館。

原圖嚟自網絡