今時今日環保呢個概念已經融入咗大家嘅日常生活當中，唔少建築嘅設計都融合咗環保建築嘅意念，咁大家又估唔到最早應用呢啲意念嘅環保建築係邊一座呢？答案就係寶琳茵怡花園喇！

呢個位於西貢區寶琳貿泰路同埋將軍澳嘅建築群，係香港房屋協會歷嚟最大規模嘅「甲類出租屋邨」同埋「住宅發售計劃」，一共設有 6幢出售住宅大廈同埋1幢出租大廈，分別喺1996-1997年間入伙。由於呢個住宅項目係用到當時新加坡同埋馬來西亞流行嘅環保建築設計意念，所以喺1998年就同香港國際機場客運大樓一樣獲得香港建築師學會頒發銀牌獎。

講咁耐，到底史友們又睇唔睇得出呢個花園邊啲地方係用到環境意念去設計呢？茵怡花園嘅建築師喺設計呢個花園嘅時候，就曾經做過日照測繪同埋風洞模擬測試，結果就根據呢兩個測試，最後設計出節能嘅建築規劃，好似窗戶方面就做到「光可進屋，風可過窗」、喺茵怡花園第三及四座中間設立咗一個空中花園、又喺大廈上設立咗擋陽蓬、優化廢水處理等等，唔知史友們仲留唔留意到有其他用心嘅設計呢？

原圖嚟自網絡