香港制水序幕

今時今日喺香港，「制水」就已經成為一個歷史名詞，基本上大家生活任何時段都可以用到充足而又乾淨嘅食水，之但係喺1967年嘅今日，對老一輩香港人嚟講就係一個好難忘嘅日子喇！

隨住香港人口急增以及工商業嘅發展，令到對水資源有住好重大嘅需求，但與此同時香港淡水資源相當缺乏，由1895年到1982年間政府就多次宣佈制水，其中呢個情況喺60年代就最為嚴重。

喺1967年2月15日，繼1963年水荒之後，香港嘅水塘持續乾旱，水塘存水量降到警戒線以下，政府亦都隨即宣佈即日起制水。之但係，情況仍然未得到改善，去到六月水荒就進一步惡化，每日供水時間由十六個鐘減到八個鐘，繼而再變成隔日先有四個鐘頭供水，認真艱辛。呢個情況去到同年八月底先因為雨季而得到改善，去到9月先至全港恢復全日供水。