奇力島奇力山仲有奇力灣

最近新春無乜嘢做，所以阿史就同朋友去咗爬山，行到一個地方叫奇力山。相信有睇開史檔嘅史友都記得阿史介紹以前維港個度有個奇力島，咁點解香港會有奇力山同奇力島呢？

其實奇力係一個英國人，佢係英國海軍測量工程師。佢响十九世紀時成為卑路乍嘅副手，嚟過香港一帶進行探測工作。後嚟佢就返咗英國，响往後日子仲參與咗好多任務，包括去西北航道尋找失蹤嘅富蘭克林爵士船隊。

至於點解香港有地方會以奇力命名呢？係因為英國對港島嘅地理測量工作，奇力係主要操作者之一。除咗奇力島同奇力山，仲有位於青洲以北航道嘅奇力海床，以及香港仔附近、火藥洲北邊一個小海灣，叫做奇力灣。