過去都同大家介紹咗香港唔少特色嘅公共屋邨,例如有以人命名嘅屋邨、又有位於離島上嘅屋邨、又有用環保概念設計嘅屋邨,香港有特色嘅公共屋邨當然唔止得咁少啦,今次阿史就想講下首個「郊區公共房屋」項目,亦即係「對面海邨」!

呢個位於西貢區嘅公共屋邨就咁聽過名都覺得有趣,之所以叫做「對面海邨」,其實係因為呢個全港最東面嘅公共屋邨真係位於「對面海」呢個地方。「對面海邨」位於康健路120號,亦都係香港房屋協會首個興建「郊區公共房屋」,喺1984、1985同埋1986年陸續落成入伙。咁可能大家都會諗到一個問題,好地地做乜要喺部區起公共屋邨呢?

原來呢個計劃嘅出現,係希望可以安置到一啲受到受郊區重建影響嘅西貢區人士,所以港府當年就出錢資助房屋協會第一次進行呢個計劃,甚至公共屋邨起成之後,租畀住戶嘅租金仲係低於市值。

既然係「郊區公共房屋」,相信大家都會相當關心一個問題,就係設計上會唔會有咩唔同架?基本上嚟講,大廈係以T型作平面規劃,最有分別嘅地方就係外型上用咗中國鄉村式房屋風格設計,用咗深啡色瓦頂,白色玻璃紙皮石修飾牆身,唔少部份仲有仿斗供裝飾及仿月門窗戶,同鄉郊嘅風格都幾符合架!

原圖嚟自網絡