早幾日內地唔少電視台都有播放自家精心製作嘅春晚節目，阿史之前就同大家介紹完央視嘅春晚，今次就想講一講近排爆紅嘅河南衛視春晚節目《唐宮夜宴》。

《唐宮夜宴》係當時春晚其中一個舞蹈節目，事後網上微博播放量達到千萬級別，而且相關話題仲有近億次閱讀量，難怪會成為微博綜藝榜晚會欄目類第一！咁叫得做《唐宮夜宴》，梗係還原返盛唐嘅景象，具體有係點樣呢？阿史就同大家逐一介紹啦！

《唐宮夜宴》呢支舞蹈長度大概就係5分幾鐘，但就由佈景、妝容、演奏等等都落足心機！呢支舞蹈就係講述正值青春嘅女樂官喺赴宴路上發生嘅趣事，通過舞蹈表達果種可愛頑皮形象同埋禁錮下嘅宮廷生活兩者之間鮮明嘅對比。由服裝去到造型都係用到極具特點嘅唐三彩元素。

唔單止咁，舞蹈開頭嘅博物館展廳入面，其實仲擺放咗安陽殷墟出土嘅「婦好鴞尊」、春秋時期嘅「蓮鶴方壺」同埋中國最早的樂器實物「賈湖骨笛」；而喺呢班少女跳舞期間，亦都有穿插《簪花仕女圖》、《搗練圖》等中國古代名畫。喺咁短時間表現到咁多唔同嘅意念，真係一個字，勁！

原圖嚟自網絡