提起九龍汽車嘅創辦人之一、曾經嘅東華醫院同埋保良局嘅主席鄧肇堅先生，唔知史友們腦海入面會有咩畫面，阿史就即時諗到鄧肇堅經常都係身穿長衫，剃光頭嘅呢個形象，今次就同大家介紹下呢位慈善家啦！

鄧肇堅，出生喺1901年3月21日嘅香港，佢嘅爸爸就係早期嘅華人太平紳士之一鄧志昂紳士，佢喺屋企四兄弟姐妹入面排行第二，所以經常被稱為「二少」。鄧肇堅早年就入讀過皇仁書院同埋聖士提反書院，後來未讀完書就喺1919年幫爸爸手打理鄧天福銀號而離開學校。

雖然佢提早離校，但鄧肇堅原來喺營商方面頗有天份，將銀行打理得好好，呢件事亦都令到佢年紀輕輕就成為香港中華總商會會董、東華醫院總理、並且後來仲係1928年以嚟歷史上年紀最輕嘅東華醫院主席。而喺1927年，佢其實亦都當選咗保良局總理，1932年亦都做埋保良局主席，所以其實佢年紀輕輕就已經好熱心公益，去到1937年仲做埋華人議員。

鄧肇堅唔單止有好多公職，佢喺商界都有唔少傑出嘅發展，就好似同樣喺1930年代，佢就同華僑雷瑞德醫生合作，投到九龍及新界地區巴士專利權，組成一隊有106部單層巴士嘅車隊，呢個亦都係九龍汽車有限公司嘅前身，亦即係後來嘅九巴，認真犀利啊！

原圖嚟自網絡