中國最早樂器實物 「賈湖骨笛」

早幾日阿史喺介紹內地春晚嘅一個節目果陣，就有同大家提到節目當中有展出到一件中國最早樂器實物「賈湖骨笛」，到底呢件樂器係咩來頭呢？阿史今次就同大家介紹下啦！

賈湖骨笛係喺1979年賈湖村民修築護村堤果陣，由村內嘅小學師生喺土坑入面搵到出嚟，據考古專家估計，呢件器物距今就有9000年至7700年，係中國出土年代最早、保存最完整並且仲可以用嚟演奏嘅樂器實物。賈湖骨笛唔單止得一枝，喺1986年果陣考古團隊就比較有系統咁對遺址進行發掘，先喺M78墓葬入面清理出兩枝，其後喺四座墓葬入面都陸續有發現。其後，部分嘅骨笛就被送到中國藝術研究院畀專家試唱，並且可以成功測試到！

咁呢枝笛到底係咩來頭，可以保存到今時今日呢？原來賈湖骨笛係以水鳥尺骨鋸去兩端關節鑽孔而成，而笛身嘅小孔估計就係用嚟調整個別音孔音差而設計，反映當時賈湖人已經明白音階同埋音距，呢個發現仲令到中國音樂文化上推至9000年，賈湖骨笛當時仲有可能已經可以達到八度音域以上，真係犀利啊！