早前阿史都同史友們介紹過佐敦曾經有個地方叫做「渡船角」，呢個地方後來就因為西九龍填海計劃被填平，而佢嘅實際位置就即係依家嘅港鐵柯士甸站一帶。「渡船角」唔單止係得個名，呢個地方以前真係有個碼頭，亦即係佐敦道碼頭。

佐敦道碼頭有住唔少威水史，喺1924年油麻地小輪拎到專利權之後，就喺眾坊街海旁嘅油麻地碼頭經營油麻地往中環嘅渡輪業務，但當時嘅油麻地碼頭只係一座簡單嘅單層建築，只可以畀單層客輪上落客。踏入三十年代，當時油麻地小輪打算引入雙層渡輪並兼營汽車渡輪服務，於是就喺佐敦道興建新碼頭，亦即係1933年3月6日啟用嘅佐敦道碼頭，一度成為九龍規模最龐大碼頭之一。

喺差唔多嘅時間，九龍巴士亦都喺碼頭旁邊設立巴士總站，並且有兩條巴士路線分別可以由碼頭出發去到深水埗同埋九龍烤，其後仲有更加多來往九龍同新界嘅路線開辦，呢個位置更加成為九龍區重要嘅交通樞紐。

去到七十年代，隨住海底隧道同埋地鐵通車之後，佐敦道碼頭嘅作用大減，汽車渡輪業務於1994年1月6日首先停航，之後仲因為西九龍開發而需要填海，令到碼頭被徵用作填海工程用地，並且喺1996年2月1日停用。

原圖嚟自網絡