佛山三水產生民族名牌飲料？

記得响九十年代，成日响電視見到一個廣告，就係體操王子李寧飲完一款飲品之後就大獻身手，旁白仲講咗句：「飲一口露一手」，無錯！呢款飲料就係健力寶。

健力寶响內地係家傳戶曉嘅飲品牌子，最特別嘅佢係源自廣東佛山三水，成就於改革開放時期，絕對係改革開放初期一個成功嘅企業。健力寶源自三水酒廠，當時酒廠廠長李經緯得知廣東體育科學研究所研製緊一款運動飲品，於是酒廠就同研究所開展合作，最後研發出健力寶呢款國產運動飲品。响八十年代初，全國掀起咗一股運動熱潮，李經緯更睇好1984年洛杉機奧運呢個契機，為國家隊提供專用運動飲品。由於1984年洛杉機奧運中國奪得15面金牌，健力寶一下子就成為咗民族品牌，之後兩年銷售額增長幾十倍。

响八九十年代健力寶同中國體壇關係密不可分，而健力寶亦為中國體壇作出咗唔少貢獻，好似出資贊助健力寶青年隊遠赴巴西留學，後嚟國家隊主力球員好似李鐵、李金羽、李瑋鋒等都係當中成員，而體操王子李寧退役創立自己服裝企業都係得到李經緯幫助。