赤柱發現百年古道石橋

繼上年年底近百年嘅深水埗主教山蓄水池被重新發現之後，民間就再次牽起一股古蹟熱潮，近排就有本地嘅行山人士同埋保育團體喺赤柱一帶發現荒廢古道，仲有埋大型石拱橋。

據相關文件記載，位於赤柱嘅呢條古道實際嘅位置就係佳美道嘅懲教署體育會會所旁邊，係香港開埠初期由赤柱通往港島嘅主要道路。喺唔少開埠早期嘅文件地圖入面，都有提到呢條路，而當中嘅一條石拱橋，就係叫做「獅子坑」石拱橋。而繼續喺古道上面行，仲會發現到另一個巨型石拱橋，就係位於「老虎坑」上嘅位置，高度至少達到三層樓。呢條古道甚至去到1881年果陣，呢條路就更加成為接駁至今日中環一帶嘅主要道路，只係後來隨住赤柱峽道及淺水灣道，呢條道路使用率降低，慢慢仲荒廢埋。

而繼赤柱發現古道之後，說時遲那時快，石澳至筲箕灣亦都發現另一條古道，雖然規模上比唔上赤柱古道，但估計係喺興建大潭水塘果陣開發。睇完呢則新聞之後，阿史就想講一句：香港真係有好多值得認識嘅古蹟啊！