銅鑼灣以前有間棉紡織染廠？

近排唔少民間保育組織都討論緊一件事，就係喺銅鑼灣聖保祿修院對出，原本就有一塊全港僅存大概80塊嘅T形路牌，但近排就不翼而飛，而路政署就住呢件事就已經報警處理。咁到底呢塊T形路牌有咩咁重要，又同呢區以前嘅棉紡織染廠有咩關係呢？阿史今次就同大家介紹下啦！

喺網上唔少圖片入面，大家應該都可以搵到呢個寫有「Cotton Path棉花路」嘅Ｔ形路牌，據路政署嘅數據，同類型嘅路牌就只係得返80塊，主要就集中喺灣仔區同埋深水埗，呢啲路牌一般只會保留喺相當舊嘅建築物之上。而呢次呢塊「Cotton Path棉花路」路牌，其實就見證住銅鑼灣一段相當重要嘅歷史。

「Cotton Path棉花路」並唔係無啦啦命名，而係因為呢區曾經真係有同棉花相關嘅產業。喺1898年果陣，怡和洋行其實就創辦過香港首間棉紡織廠「香港棉紡織染公司」，當時就入將喺印度入口嘅棉花織成棉綫、衣襪等，生產出嚟嘅棉綫仲會售予本地及內地針織廠。只係去到1914年，技工短缺，電力與淡水供應不足嘅情況持續，怡和就決定將工廠北遷上海。