前九龍消防局係咩樣？

如果史友們經常去開尖沙咀，又有經過過1881 Heritage，唔知大家又有冇留意到喺1881呢座前水警總區總部前方，其實仲有一座風格唔太相似嘅紅磚建築呢？唔知史友們又估唔估到呢座建築原身係啲咩呢？

咁阿史都唔賣關子，直接就同大家開估啦，呢座樓高兩層嘅紅磚建築望落相當優雅，但大家都未必估到呢度曾經就係九龍消防局。九龍消防局喺1920年落成，早年就真係得一座兩層建築，上層就係消防員宿舍，而下層就係車房；但後來隨住消防員編制增加到三十人，就另外再加建一座兩層建築作為宿舍。而當時嘅前九龍消防局，喺30年代嘅時候，就已經圍繞住水警總部、香港基督教青年會同埋半島酒店，格局同今時今日都好相似。

時間去到70年代，尖沙咀人口增加，隨之而嚟火災或者發生其他意外嘅機率都增加，九龍消防局亦都開始擴充，去到廣東道現址興建尖沙咀消防局。而原址最初就畀香港郵政署包裹收發部使用，後來就先後轉交畀水警總區總部、油尖區文化藝術協會等，時至今日就同樣被改建成1881。