「思德書室」曾經係粉嶺學校校址？

繼續同史友們介紹香港嘅歷史建築，以往都同大家講唔少新界嘅傳統中式建築，而喺唔少圍村入面早年都會有書室呢樣建築，畀族中嘅子弟學習。之前就同大家介紹過屏山嘅覲廷書室，今次就想講下粉嶺南圍嘅一間「思德書室」。

雖然話就話係「書室」，但早年呢類建築都唔係單一用途，就好似呢間「思德書室」咁，建於道光26年（1846年），係一間兩進式家祠兼學塾，屬於新界五大家族粉嶺彭氏三所祖祠之一。書室以「思德」為名，實際上就係紀念彭氏第六世祖彭思隱而建。由於書室嘅規模唔大，只係得幾個課室，所以以往都只係畀彭姓村民入讀，外姓人一律都被拒絕入讀。

思德書室以前就一直都係提供中國傳統教材教學，直到1936年開始，呢個地方就借咗畀政府資助嘅粉嶺學校作為校址，配合政府嘅政策提供現代嘅教學，現時書室出面都仍然保留咗當時「粉嶺學校」牌坊。而喺粉嶺公立學校落成之後，校舍就正式搬咗過去，書室就一度成為教師宿舍，現時就回復返做族人作祭祀及舉行宴會嘅場地。