秀茂坪因為一種草而得名？

觀塘區嘅地名阿史都同大家介紹唔少，繼講完油塘、藍田、牛頭角之後，今次就想同大家介紹一個地方，喺老一輩心目中呢個地名就有第二啲意思，但其實最初就係因為一種草而得名，呢個地方就係秀茂坪喇！

呢個位於九龍東部嘅地方，現時已經係一個主要由公共屋邨組成嘅住宅區，仲有一個好有意頭嘅名「秀茂坪」，但其實喺百幾年之前，秀茂坪嘅原名都真係充滿鄉土味。喺許永慶、羅文祥百幾年前寫成嘅《新界九約竹枝詞》入面就有一句提到「春遊忽到『蘇茅坪』，睇見牛頭角又生」，呢度所講到嘅「蘇茅坪」，就係今時今日嘅秀茂坪喇。之所以會咁叫，其實就係因為呢個地方以前生滿蘇茅草，再加上地勢廣闊而言，兩種特徵加埋就係「蘇茅萍」喇！

而後來又點解會變咗做秀茂坪呢？原來喺香港開埠早年，英國人就曾經將呢個地方翻譯咗做「So Mau Ping」，再加上以往呢片土地上就有一個七號墳場、亦都係日佔時期嘅萬人塚，令到附近居民諗到「掃墓坪」呢個讀法，所以後來當局就決定改返個雅稱，叫做「秀茂坪」並且一直沿用至今！