台灣有樣菜式叫做「左宗棠雞」？

早兩日阿史就同大家介紹到晚清四大名臣之一嘅左宗棠，喺介紹到呢位歷史人物嘅時候，唔少史友都「錯重點」諗起一道好出名嘅菜式，今次阿史就同大家介紹下啦！

大家冇睇錯，阿史亦都冇打錯，事實上真係有道菜式係以左宗棠命名，呢一道就係「左宗棠雞」喇！「左宗棠雞」嘅整法唔太複雜，先至將一隻雞脾去骨切丁切塊，跟手就用醬油同埋太白炒醃漬，再放落油鑊炸到岩岩好，跟手就用醬油、糖、醋、乾辣椒等調味料大手快炒，咁就會得出一道鹹辣口味嘅「左宗棠雞」。

睇到呢度，史友們可能都會有個疑問，就係點解呢味菜會同左宗棠有關係？咁就要由1952年講起喇！當年美國就派出太平洋第七艦隊司令亞瑟·雷德福去到台灣訪問四日，當時台灣方面就搵咗被稱為「湘菜廚神」嘅彭長貴研究宴請菜單。彭長貴如是者就用一啲特別醬料整咗道雞出嚟，由於美國嘅隨行人員都食得好開心仲想問菜名，彭長貴就隨口答咗「左宗棠雞」。而後來有人問到當中原因，彭長貴就話，因為左宗棠為清朝湘軍大將，而當時賓主均為將領，而左宗棠又係同佢係同鄉，所以就用佢個名命名喇！