香港以往都有唔少慈善家,喺從商從政之餘都仍然熱心公益,捐獻資助早年香港公共事務嘅發展,就好似學校、醫院等等嘅公共設施,唔少都係以捐贈者嘅名命名,咁唔知史友們又有冇聽過方樹泉呢個名呢?

方樹泉出生喺1899年,原籍廣東東莞,喺1927年嘅時候就跟隨父親嚟到香港發展,而佢哋一家早年就係喺筲箕灣開設「義德芝麻廠」,全盛時期仲同政府租咗成萬呎公地用嚟晒芝麻,真係巴閉。踏入30年代,佢就從事埋進口桂皮、芝麻轉售嘅事務,將呢啲原料出口去外國,去到50年代佢就已經成為全港最大嘅桂皮出口商。後來就因為韓戰嘅爆發令到佢生意大受打擊,先至改為從事地產同埋建築行業。唔知史友們又知唔知,協成行正正就係方樹泉同埋佢個仔方潤華所創立,今時今日就已經係香港老牌嘅地產商。

方樹泉從商嘅一面當然係犀利,但從善嘅一面相當好。早喺三年零八個月嘅時候,方樹泉就已經出手施賑流港難民,見到租客有困難,佢唔單止免租,甚至仲補助每名租客十斤白米、喺廣州救濟同鄉會申請援助幫助難民。去到戰後,佢更加熱心公益,先係喺家鄉捐建小學同醫院,喺1977年開始亦都決心喺家族公司抽取10%以上利潤用於行善。

據統計,計埋內地同香港,佢所捐建嘅幼稚園去到大學至少就有500個,而醫療相關嘅項目亦都接近40個,呢個數字仲未計入醫療教研項目,真係一個名乎其實嘅慈善家。

原圖嚟自網絡