前個排鹿頸槍堡群再次引起關注，連帶香港淪陷期間東江縱隊港九獨立大隊同新界居民嘅抗日事蹟都响網上引起熱議。兩會期間有港區人大代表仲建議將港九獨立大隊抗戰歷史加入香港本地教材添。

如果要將港九獨立大隊抗戰歷史加入香港本地教材，咁就要知道東江縱隊港九獨立大隊响香港淪陷期間所作出嘅貢獻。東江縱隊港九獨立大隊前身係廣東人民抗日游擊隊港九獨立大隊，成立於1942年。到咗1943年，中共中央成立廣東人民抗日游擊隊東江縱隊，港九獨立大隊成為東江縱隊下轄嘅分隊。不過後世人都習慣將廣東人民抗日游擊隊港九獨立大隊成立日子視為東江縱隊港九獨立大隊成立之時。

呢隊港九大隊最初設有長槍隊同短槍隊，之後按地區分為西貢、沙頭角、元朗、大嶼山、市區、海上，共六個中隊，成員主要都係由新界原居民組成。咁港九獨立大隊响香港淪陷期間點樣對抗日寇呢？主要係有兩方面。第一就係以游擊形式抵抗日軍。由於當時日軍主要係控制港島及九龍半島地區，令新界郊區能夠成為游擊隊活動嘅地方，所以港九大隊多次成功以游擊方式攻擊日軍，甚至有一次行動偷襲啟德機場。

除咗抵抗日軍外，港九大隊更肩負另一重要任務，就係收集情報同秘密營救滯留香港被日軍搜捕嘅重要人士等工作。港九大隊為咗營救重要人士，採用多達十二條路線，最後獲救脫險嘅人數多達八百幾人，包括何香凝、廖承志、柳亞子、鄒韜奮、茅盾、司徒慧敏、鄧文釗等知名人士。另外佢哋亦响淪陷期間營救遇襲嘅盟軍，最出名嘅就係美國飛行員克爾中尉；又為英軍服務團提供情報資料。

回歸之後東江縱隊港九獨立大隊嘅抗日事蹟愈嚟愈受重視，至於點樣將呢段歷史加入香港本地教材呢？留返俾特區政府官員們諗喇！

原圖：網絡