早兩日就係國父孫中山先生逝世嘅96周年，雖然事隔咁耐，但時至今日各界都仍然會舉行儀式緬懷呢一位「民主革命先行者」。而講起呢位偉大嘅人物，之前阿史就為大家介紹咗佢嘅生平，唔知大家又知唔知孫中山先生嘅七字遺言呢？

咁大家都知道，其實孫中山最後病逝嘅地方就係當時嘅北平，咁佢點解會冇啦啦去到呢度？原來喺馮玉祥發動北平政變嘅1924年，佢就邀請咗孫中山北上商量，但由於路途遙遠，孫中山一去到北平就已經病倒，經過各方醫治之後都冇太大好轉，最後就只好請孫中山考慮遺囑。

孫中山最後留低咗三份遺囑，分別係《政治遺囑》《家事遺囑》同埋《致蘇聯政府遺書》，唔講唔知，除此之外原來仲有七個字嘅遺言。喺孫中山為遺囑簽字之後，其實佢身體已經相當虛弱，當時宋慶齡、汪精衛、宋子文、孔祥熙等人就已經圍繞喺床邊，據講孫中山當時用極為微弱嘅聲線講自己呢次嚟到北京嘅目的係為咗和平統一，但就因為自己嘅病而令到呢件事未成，希望在場嘅人都可以努力奮鬥令到國民會議早日開成。在場嘅人都聽到眼濕濕，而去到最後，孫中山就斷斷續續講咗七個字出嚟，呢七個字就係「和平、奮鬥、救中國！」

原圖嚟自網絡