曹光彪為北上設廠「給中央寫信」

香港知名商人曹光彪離世，令唔少香港人都覺得好惋惜。講到曹光彪唔少人都會提起港龍航空，但其實佢另一件為人津津樂道嘅事，就係開創港商投資內地嘅先河。

話說响1978年，當時廣東省尚未有港商投資嘅工廠，而响香港做紡織生意做到風生水起嘅曹光彪，就成為第一批响內地投資設廠嘅香港商人。响佢投資之下，廣東省首家「三來一補」（即來料加工、來樣加工、來件裝配、補償貿易）嘅企業珠海香洲毛紡廠响1978年動工，成為珠海開辦首家中外合資工廠，亦開創港商响內地投資嘅先河。

對於呢間毛紡廠，鄧小平生前响一次訪問中就講咗個相關故仔，佢話當時改革開放啱啱開始，就有一位香港資本家「給中央寫了信」，表示要到內地投資設廠，最後中央同意咗。而鄧小平口中嗰位「香港資本家」，就係曹光彪。响1984年，鄧小平南巡到珠海，就提出要到行程以外嘅香洲毛紡廠參觀，仲對曹光彪大力讚許。