上年年尾就有市民意外發現到主教山配水庫呢個百年歷史建築，隨即就引嚟各界前往想去一睹呢個咁壯觀嘅建築，民間亦都出現一股「全民考古」嘅熱潮。其中一個當時由保育團體搵到出嚟，同樣有百年歷史嘅配水庫，就有立法會議員公佈咗內部嘅一啲相片，呢個配水庫就係油蔴地配水庫。

如果大家之前都對主教山嘅古典風格建築有興趣，咁呢次阿史要介紹嘅油蔴地配水庫可能都會岩大家心水，事關油蔴地配水庫唔單止係僅餘幾座嘅戰前配水庫，而且仲係紅磚拱門建築，外形相當優雅。

翻查資料，其實油蔴地配水庫嘅歷史仲耐過主教山配水庫，呢個配水庫係喺1894年始建，甚至仲比九龍水塘早咗16年出現，係九龍第一個以水塘為本嘅供水系統。要知道喺英國租借新界嘅時候，其實九龍係未搵到有合適嘅土地興建水塘，大部分地方都仲係依靠水井取水。

直到1882年，英國國皇家代理人顧問工程師查維克就嚟到香港調查整體嘅衛生情況，並且提議增加供水設計，結果九龍供水計劃就喺之後幾年逐步落實，當時油蔴地村以北嘅三個山谷就曾經開鑿三口井，經過抽水站泵水之後，食水就會送到配水庫調節供水。所以喺同類建築入面，油蔴地配水庫真係可以畀大家廣義咁認識到早年九龍供水系統嘅運作。

原圖嚟自網絡