【講開有段故】李鴻章臨終前八字奏摺 睇到慈禧眼濕濕?


呢幾日唔少媒體都拎中美兩國最高外交官員外交會議嚟同120年前辛丑年嘅「和會」比較,提起當年嘅簽定和約嘅主要人物,相信唔少史友都知道正正就係晚清四大名臣之一嘅李鴻章,而李鴻章簽呢份不平等條約果陣,仲喺談判過程吐咗幾次血,最後仲含恨而終。而佢喺死後,慈禧就收到李鴻章八字奏摺,今次阿史就同大家講一講。


李鴻章一生經歷過唔少風波,就好似太平天國事件、洋務運動、中法以及甲午戰爭等等,他亦都為清朝嘅現代化作出唔少努力,但好可惜佢亦都代表清朝簽咗好多條不平等條約,而《辛丑條約》就係其中一條。本身晚年嘅李鴻章身體已經麻麻,甚至仲有咳血嘅情況,之但係一收到慈禧任命佢去同列強就八國聯軍一役談判,佢就唔理家人反對,決心去到北京。


沿途上佢舟車勞頓,談判過程中吐咗好幾次血,盡佢所能將清政府嘅損失降低,最後喺1901年佢簽署咗《辛丑條約》,冇幾耐就因為胃血管破裂大量吐血病逝。後來慶親王奕劻就將李鴻章一道奏摺呈交畀慈禧,並轉達李鴻章死訊,慈禧一打開奏摺就見到「舉行新政,力圖自強」八個字,慈禧當場就眼濕濕,仲喊住講「大局未定,倘有不測,再沒有人分擔了。」


原圖嚟自網絡