今朝早就同史友們講到晚清四大名臣之一嘅李鴻章簽「辛丑條約」果陣大吐血，臨終前都仍然心牽家國，令到慈禧眼濕濕。咁到底當時嘅中國形勢差成點，先至會令一位晚年嘅老人家盡心盡力去拯救呢？當時就有一幅1898年刊登嘅《時局圖》可以描繪到當年中國形勢有幾惡劣。

之前阿史都曾經講過呢幅圖好有可能係由興中會會員謝纘泰繪製，當中就係以「列強瓜分中國論」去描繪當時中國慘況，咁到底具體呢幅圖又係點呢？大家可以詳細留意下新版《時局圖》圖中嘅唔同動物。

呢啲動物、地點其實都係各有寓意，代表唔同嘅國家，就好似北方嘅熊係代表俄國、長江流域嘅犬代表英國、中南半島蛤蟆代表法國、山東位置「長蟲」就代表德國，仲有以太陽比喻日本。而唔知史友們有冇留意到，其實圖入面仲有一隻飛鷹，就係代表當時喺中國未有佔據土地嘅美國，咁到底點解會畫埋入圖中呢？呢一點阿史下篇再同大家介紹。

原圖嚟自網絡