據廣大媒體報道，中國著名核動力專家、有「中國核潛艇之父」之稱嘅彭士祿22日就喺北京逝世，享年96歲。

彭士祿出生喺1925年嘅廣東，係中國早期農民運動領袖彭湃嘅仔，喺1929年佢就成為孤兒先後被送到二十幾戶人家寄養，童年亦都兩次被國民黨捉入監獄折磨，直到1940年周恩來就成功派人搵到15歲嘅彭士祿，而事後彭士祿亦都對呢件事相當感恩，仲表示自己嘅生命都係由老百姓用鮮血換嚟，所以會好好報答佢哋嘅恩情。

彭士祿亦都講到做到，喺1951年佢就以優秀嘅成績獲得留學蘇聯嘅機會，喺呢段日子入面佢都係努力學習，從來都未試過喺12點之前就寢，亦都係呢段時間，佢同「核」結下結下緣份。去到上世紀50年代尾，佢就接到命令要秘密返到中國，而當時嘅任務就係要佢去原子能所研究，主力開發核動力。由於早年蘇聯拒絕為我國研製核潛艇提供援助，國家經濟亦都相當困難，所以喺呢段時間，彭士祿同埋佢嘅同事都係「吃着窩窩頭搞核潛艇」。

去到1962年彭士祿開始主持潛艇核動力裝置論證同埋開發，並且喺1965年告別妻子兒女參與籌建中國第一座潛艇核動力裝置陸上模式堆試驗基地，最終中國第一艘核潛艇「長征一號」喺1970年12月26日正式啟用，中國亦都成為世界上第五個擁有核潛艇嘅國家，彭士祿正正就係「中國核潛艇之父」。

原圖嚟自網絡