域多利軍營土地交還政府

香港公園今時今日已經成為唔少港人假日出遊嘅好去處，但史友們又知唔知一片咁大範圍嘅土地點解會變成一個公園呢？咁就要由當年今日開始講起喇！

香港公園現時呢片土地，有唔少範圍其實就係早年嘅域多利軍營，係早年駐港英軍一個主要嘅軍營，成個範圍係喺紅棉路、堅尼地道及金鐘道交界。呢個軍營早喺1840年代就有駐軍，整體嘅建築就喺1843-1874年間逐步建立，全盛時期一共就有三十幾座建築物，當中唔少喺日佔時期仲被日軍佔用。

而去到1970年代，由於中環已經成為一個相當重要嘅商業中心，所以為咗增加商業用地，當時政府就同軍方商議，最終喺1979年3月30日，駐港英軍撤出域多利軍營，除咗小部分有特色嘅建築物得以保留之外，其他建築都喺1985至1992年拆卸。原有嘅土地部分就成為政門部門用地好似政府合署同埋高等法院同埋商業用地，大部分就成為今日嘅香港公園。