尋日就同史友們講起「中美南海撞機事件」犧牲嘅一位英雄飛行員王偉,而由於呢件事當年未有得到一個公道嘅處理,所以被國民認為係同1990年代「三大恨」並列嘅事件之一。而提起當時嘅「三大恨」,除咗有阿史介紹過嘅1999年炸館事件之外,另一件就係1993年銀河號事件喇!
1993年銀河號事件相信唔少史友可能都會有印象,「銀河號」(Yinhe)本身就係一艘貨櫃班輪,固定航線就係由天津新港途經上海、香港、新加坡等地,最後去到科威特。之但係,喺1993年7 月7日果陣,呢艘貨輪如常出發共載628個貨櫃,本身預計會喺8月3日抵達波斯灣杜拜港卸貨,但點知去到7月23日,美國就聲稱自己有確鑿證據證明「銀河號」貨輪載有可以製造化學武器嘅硫二甘醇、亞硫醯氯並且會運往伊朗。
當時美軍就派出2艘軍艦、5架直升飛機對銀河號全程跟蹤監視,並且喺公海上截停銀河號,要求喺公海上進行檢查或者要船隻返航。當時中方船員喺三個星期內都堅拒美艦人員登船,而美方就威脅話要制裁中國。雙方一度堅持唔肯讓步,但後來喺中方壓力之下,美國態度軟化並且同意由第三方進行檢查,結果喺沙烏地人員檢查之下,喺「銀河號」並冇發現任何化學武器。
面對住呢次「老屈」,美國唔單止唔肯道歉,喺全程跟蹤監視之下仲反過嚟指「銀河號」可能中途已經將貨物傾倒入海,事件最後不了了之,就成為國民心目中嘅1990年代「三大恨」之一喇!
原圖嚟自網絡