尋日就同史友們講到中美喺1990年代有幾件重大嘅衝突,但當時都因為國力嘅差距令到呢啲事件得唔到一個公道嘅處理,所以當時嘅國民稱呢幾件事件為「三大恨」。尋日就講咗「銀河號事件」,當中美軍唔單止用上軍艦同直昇機想強行檢查「銀河號」,仲遮蔽咗「銀河號」嘅GPS系統,令到呢艘船隻喺海上飄流三星期。

恨還恨,但始終都係要痛定思痛,「銀河號事件」發生之後,中國政府就決心做一件事,就係研發導航衛星系統。於是,喺1994年開始,中國就正式進行第一代北斗衛星導航試驗系統研製,仲成功喺2000年發射兩粒靜止軌道衛星。而去到2004年,中國就繼續投入資金啟動具有全球導航能力嘅北斗衛星導航系統建設,呢個就係第二代嘅北斗,由2009年去到2012年就成功有14顆衛星構成北斗二號系統,為亞太大部分地區提供定位導航授時服務。

至於嚟到第三代,就係由2009年去到2020年7月29日為止,北斗三號55粒衛星都入網工作,衛星數量已經遠遠超過美國衛星定位系統GPS,並且同137個國家簽訂了合作協議,係世界最領先嘅衛星系統,以往嘅奇恥大辱已經唔會再發生。

原圖嚟自網絡