尋日就同史友們講到因為「銀河號事件」令到中國痛定思痛決心研發「北斗」，而無論係提起「北斗導航系統」定還是「雙星定位系統」，阿史都諗到一個人，呢個人正正就係中國航天專家陳芳允。

陳芳允出生喺1916年，係浙江黃岩人，1934年以18歲之齡考入清華大學物理系，後來因為抗戰關係轉輾就去咗雲南昆明西南聯合大學，仲喺果度任教埋。而去到1945年，佢就曾經去過英國嘅科索無線電廠研究室從事電視同埋船用雷達研究，回國之後就被委以重任，先去過上海國立中央研究院、中國科學院物理所、電子學所等研究所工作。

咁佢到底係幾時先開始參與兩彈一星嘅研究？喺1964年，陳芳允就為國家長遠嘅科研提出過重要嘅方案，呢個就係「原子彈爆炸測試儀器」；與此同時佢亦都參加咗「衛星測控系統」嘅設計工作、完成咗微波統一測控系統，令到中國通信衛星可以喺天上運行，佢嘅發明令到航天測量船上電磁兼容問題得以解決。

而去到1983年，佢就同其他學者一齊提出「雙星定位系統」嘅計劃，有別於其他國家GPS需要最少4顆衛星嘅條件，陳芳允嘅設計係通過虛擬衛星，加上計算兩顆地球同步通信衛星與接收者之間距離，令到中國開始建立到自己嘅「GPS」，為雙星定位、北斗奠基嘅其中一個人物絕對就係佢。

而佢曾經寫過一首詩，阿史就認為係一個好好嘅總結：「人生路必曲，仍須立我志。竭誠為國興，努力不為私。」

原圖嚟自網絡